اهدتنى صديقتى الفراشة الجميلة تاج لم افهم فى البدايه حتى اكتشفت انى يجب ان اجيب على بعض الاسئلة
والان ساحاول ان اجيب وساحاول ان اتحرى الصدق والدقه
اولا: هواياتى
انا مجنونة قراءة واى ورقة بتقع تحت ايدى لازم اقراها
كمان بحب الكتابه مش بس شعر لكن كتير الكلام مش بيطاوعنى
بحب the face book علشان بعرف منه اخبار اصحابى
ثانيآ: أشهر عيوبى
انا كثيرة الاكتئاب لان المثل بيقول اللى يشوف بلاوى الناس تهون عليه
بلوته لكن انا بحزن واتالم اوى لما اشوف الآم غيرى مش مثاليه لكن
يمكن عبط
ثالثآ:حاجات بكرهها جدآ
الظلم ده شىء فظيع جدآ بكرهه اخر حاجه
كمان الكدب وتزييف الحقائق
الاستغلال ومحاولة فرض الراى بالقوة
تقييد الحريات
رابعآ: حاجات بحبها اوى ومش بمل من تكرارها
سؤال صعب اوى لانى بمل بسرعه جدآ لكن بحب اتكلم مع اصحابى القريبين ليا
ممكن نتكلم بالساعات وفى الغالب مش بمل
القراءة ومش بمل بالذات من قراءة كتب توفيق الحكيم الراجل ده عبقرى بجد
مشاهدة الفراشات بحس بمتعه لما تمر قدامى فراشه
بحب القمر بالذات ليلة 14 بعشقه
خامسآ:سؤال بيستفزنى جدآ
هو مفيش حاجه فى السكة؟
والسؤال ده بيسالوه كتير اوى والحاجة اللى مستنينها فى السكه هى عريس
مع انى دايمآ كنت بحس انه سؤال يتسال لواحدة متجوزه عن اذا كانت
حامل ولا لا
مش عارفه انا المفروض اقول ايه لاى حد حشرى بيسال عن جوازى
وبيسال سؤال غلط صبرنى يا رب
سادسآ:امنيتى فى الحياة
لما كنت بتكلم عن احلامى كانت الناس تقول انى بمثل واقول حاجات مثاليه اوى
لكن بما انكم متعرفونيش فانا هتكلم براحتى
انا نفسى اعرف الهدف من حياتى مش هدفى لكن هدف ربنا من انه خلقنى
واحقق الهدف ده نفسى اكون سبب سعادة لكل حد يعرفنى
نفسى بلدنا تتولد من جديد جميلة نضيفه متقدمه مليانه حرية وكرامة اهلها متصانه
نفسى احل مشكلة اطفال الشوارع نوفر لهم بيت ورعاية والاهم محبة
نفسى فى حاجات كتير لا الوقت ولا المساحة تسمح اكتب كل حاجه
اه نسيت نفسى انشر كل اللى كتبته فى كتاب بس مش عارفه يستحق النشر ولا لا
سابعآ:حاجات مؤمنه بيها جدآ
التغيير انا مؤمنه ان التغيير ممكن صعب لكن ممكن وانه مسئولية كل شخص
انه يغير اللى مش عاجبه فى نفسه والاوضاع من حواليه والكون كله لو امكن
المهم يكون تغيير للافضل
ثامنآ:اكتر حاجه فاشله فيها
انى امسك اعصابى ومتنرفزش لما حد يستفزنى بتدرب كتير انى متاثرش
بتصرفات الناس المستفزه لكن بفشل كتير كمان
تاسعآ:وظيفة بحبها
الصحافة لما تكون حرة ولو انى اشك ان فى حاجه كده
عاشرآ: مثلى الاعلى فى الحياة
انا هبط هبط مش قادرة
واحد بس مش كفاية لكن بحترم وبحب ناس كتيير منهم مجدى يعقوب
جراح القلب المصرى العالمى وطبعآ احمد زويل وتوفيق الحكيم اللى كان يستحق
جايزة نوبل بجد ودكتور رفيق نخله استاذى فى الجامعه الامريكيه ودكتور عماد كامل
بردوا استاذى فى الجامعه الامريكية
بهدى التاج لمين؟
ساعد نسرين الايمن
شيماء سمير
حدوتة
المفقوعة مرارتها
