اسفكسيا الكلام

حاسس الكلام محبوس فى حنجرتى ومش منطوق

كلام كده يتحس ذى الجمال والحب ورجوع الحقوق

أحاسيس جميلة قوى وساعات حزينة قوى

لكن الكلام عاجز قوى ذى اللى متحوط بطوق

و أدور أداور عن لغة توصف لكم مشاعرى

يمكن تحسونى وتقدروا شجونى

لكن الكلام حبسوه زمان فى سطور الكتب

وفضل هناك مزنوق

لو عشت مش مفهوم انا ومكتوم

ابقا أنا المحقوق

معرفتش أوجد لغه علشان تحررنى

من صمتى و ألآمى فضل فى حنجرتى كلامى

ومت أنا مخنوق

انا مجنون

انا مجنون
كل ما أحاول أقوم أو أشب
القا أيدين الزمن القاسى تدوسنى لتحت وفوقى تدب
كل ما أحاول أرفع راسى
القا رجول الناس فوق راسى بتقول طاطى أوعى تقب
اوعاك تحلم اوعاك تفهم اوعاك حتى تفكر يوم
خليك يا ابنى كده ع الهامش
اوعى تناور اوعى تناوش
تحت رجول الناس هتعيش أصل أبوك هنا هو كان عايش
ليه خانقين حلمى جوايا ليه حاطين قدامى مرايه
ليه عايزنى اشوفنى الواقتى وانا صورتى بكره جوايا
انا عايز اكبر اتحرر انا عايز من الخوف اطهر
انا هبقا بكره شىء تانى طول ما انا بحلم بفهم افكر
اوعوا تقولوا ده وهم كبير اصل اساس الكون تغيير
وانا طول عمرى شايفنى مهم قوى وقادر ع التأثير
وبتأثيرى هغير نفسى وهغيركم طول ما انا عندى حلم و رؤيه ووعى
وهفكركم عمرى ما هفضل هنا مسجون مهما الناس قالت مجنون
لو حلمى بتغيير الكون يبقا جنون أنا مجنون
ذى جاليليو ما كان مجنون مايكل انجلو كان مجنون
هو يا ناس ينفع رسام جواه صورة ما يرسمهاش
وانا جوايا صورة لبكرة ليكو وليا ازاى بس محققهاش
لا وحياتكم حلمى ده غالى وهحققه مهما يكون عالى
وفى احلامى ليكو مكان وهعلمكو تقولوا كمان
ان الكون له رب عظيم بس التغيير ع الانسان