انا قلبى عاشق عشق ما له بديل
يا ام العيون تبكى يفيض النيل
واما الشفايف تبتسم ليا
انط اطير واحقق المستحيل
انا عقلى رافض تبقى مظلومة
واعيش فى حضنك ذليل وحقوقى مهضومه
يا سلة القمح من الفين سنة
ازاى تباتى جعانه وعيالى محرومة
انا جسدى رافض ينحنى للوهم
واعيش ويركبنى الف هم وهم
ويوم ما اموت يقولوا مات محروق
او جثته دابت خلاص فى اليم
انا صوتى رافض ينحبس فيا
يمكن صراخى اليوم يصبح معدية
اعدى بيها اليكم واما نتلاقى
نصنع بايد الحق لبلدنا حرية
انا روحى رافضة تهجرك
انا عاشقة لترابك
ويقولوا مهما يقولوا
انا لاجئه على بابك
ويوم ما احس الغرق
هامسك باتوابك
ويوم ما احس العطش
تسقينى حنية
